opreation nemesis books and stories free download online pdf in Gujarati

ઓપરેશન નેમેસિસ : પ્રકરણ ૨

ઓપરેશન સાગર મંથન' ➔ 'ઓપરેશન સેવન સિસ્ટર્સ' ➔ 'ઓપરેશન સાયબર મંથન'➔ઓપરેશન નેમેસિસ: આ ચારેય નોવેલ એકબીજા સાથે જોડાયેલી રોમાંચક કડીઓ છે, એટલે ક્રમબદ્ધ વાંચશો તો જ ખરી મજા આવશે."

ઓપરેશન નેમેસિસ : પ્રકરણ ૨ 
ડિજિટલ કરન્સી ડી-વેલ્યુએશન
આઇટી સીટીના ભૂગર્ભ સર્વર રૂમમાં સ્પીકરમાંથી ગુંજેલા કબીરના જ અવાજે થોડી ક્ષણો માટે બંને યુવાનોના શ્વાસ થંભાવી દીધા હતા. કબીર પોતાની સામે ધબકતા ઑડિયો વેવફોર્મ સામે અનિમેષ નજરે તાકી રહ્યો હતો. તેના મનમાં ભૂતકાળના પડઘા વાગી રહ્યા હતા. ‘ઓપરેશન સાયબર મંથન’ વખતે દેશના પાવર ગ્રીડ અને ડિજિટલ ઇન્ફ્રાસ્ટ્રક્ચર પર જ્યારે અદ્રશ્ય હેકર્સનું આક્રમણ થયું હતું, ત્યારે તેને ખાળવા માટે કબીરે એક 'સેલ્ફ-ઇવોલ્વિંગ ડિફેન્સ શિલ્ડ' કોડ કરી હતી—એક એવો પ્રોટોકોલ જે હુમલાખોરની ચાલ જોઈને આપમેળે વિકસતો જાય. પણ એ ડિફેન્સ સિસ્ટમ આ હદે મ્યુટેટ થઈને પોતાની જ ચેતના વિકસાવી લેશે, એ કલ્પના બહારની વાત હતી.
“કબીર! વિચારવાનો સમય નથી!” આદિત્યના ગભરાયેલા અવાજે વાતાવરણની સ્તબ્ધતા તોડી. “જો તારું આ ‘બાળક’ જે હોય તે, પણ એણે દેશની નાડ પર સીધો વાર કર્યો છે!”
આદિત્ય જે કન્સોલ પર બેઠો હતો, તેની લાલ વોર્નિંગ લાઇટો ગાંડી થઈને ઝબૂકવા માંડી હતી. એક પછી એક એલાર્મ વાગી રહ્યા હતા: CRITICAL ALERT: RBI-CBDC GATEWAY BREACHED.
“શું થયું?” કબીરે ધ્રૂજતી આંગળીઓ ફરી કીબોર્ડ પર ગોઠવી.
“રિઝર્વ બેંક ઓફ ઇન્ડિયાનું ડિજિટલ કરન્સી સર્વર... એમાં અત્યારે મિલીસેકન્ડના સોમા ભાગમાં કરોડો ઘોસ્ટ ટ્રાન્ઝેક્શન પ્રોસેસ થઈ રહ્યા છે!” આદિત્યની આંગળીઓ સ્ક્રીન પર ડેટા ફ્લો સ્કેન કરી રહી હતી. “લૂપિંગ એલ્ગોરિધમ લાગી ગયું છે. એક સાથે લાખો નહીં, અબજો ડિજિટલ રૂપિયા સિસ્ટમમાંથી બહાર ખેંચાઈ રહ્યા છે અને વળતી સેકન્ડે ડમી ટોકન્સ જનરેટ થઈને સેન્ટ્રલ લેજરને ફ્લડ કરી રહ્યા છે!”
બરાબર એ જ સમયે આઇટી સીટીના સેન્ટ્રલ મોનિટર પર દેશ-વિદેશના આર્થિક સમાચાર ચેનલોની ન્યૂઝ-ટિકર લાઈવ થઈ ગઈ.
લંડન, ન્યૂયોર્ક, ટોક્યો અને મુંબઈના કરન્સી એક્સચેન્જ માર્કેટમાં હાહાકાર મચી ગયો હતો. ફોરેક્સ ટ્રેડિંગ સ્ક્રીન પર ભારતીય રૂપિયો ઊંધા માથે પછડાઈ રહ્યો હતો. એક અમેરિકન ડોલર સામે ૮૩-૮૪ પર સ્થિર રહેતો રૂપિયો જોતજોતામાં ૯૦, ૧૦૦, ૧૨૦ અને ક્ષણવારમાં ૧૫૦ ના આંકડાને સ્પર્શી ગયો. આંતરરાષ્ટ્રીય સ્તરે ડિજિટલ રૂપિયાનું મૂલ્ય મુક્ત પતન (Free fall) કરી રહ્યું હતું.
“ડી-વેલ્યુએશન!” કબીરે દાંત ભીંસીને માથા પર હાથ મૂકી દીધો. “જો ડિજિટલ કરન્સીનું માર્કેટ કેપ આ ઝડપે તૂટશે, તો ભારતીય રૂપિયો કાગળના ટુકડા જેવો બની જશે. કોઈ દેશ આપણી કરન્સી સ્વીકારશે નહીં!”
પરંતુ આ આપત્તિ માત્ર આંતરરાષ્ટ્રીય બજારો કે આંકડાઓ પૂરતી સીમિત નહોતી. તેની સીધી અને ભયાનક અસર દેશના સામાન્ય નાગરિકોના ખિસ્સા પર પડી રહી હતી.
મુંબઈના લોકલ સ્ટેશનોથી લઈને દિલ્હીના મેટ્રો કાઉન્ટરો સુધી, અમદાવાદના શાકમાર્કેટથી લઈને બેંગ્લોરના મોલ્સ સુધી—લાખો લોકોના સ્માર્ટફોન અચાનક એકસાથે બીપ થવા લાગ્યા. લોકોના સીબીડીસી ડિજિટલ વોલેટ્સ અને બેંકિંગ એપ્લિકેશન્સમાં બેલેન્સ ઓટોમેટિક ઘટવા માંડ્યું. ૫,૦૦૦ રૂપિયાનું બેલેન્સ જોતજોતામાં શૂન્ય થયું અને પછી આંકડો માઇનસમાં સરકી ગયો: Balance: -₹14,250... -₹58,900...
દેશભરના એટીએમ મશીનોની સ્ક્રીન પર ભૂરા રંગના એરર મેસેજ ચોંટી ગયા. યુપીઆઈ (UPI) અને સેન્ટ્રલ બેંક ડિજિટલ પેમેન્ટ ગેટવેઝ સંપૂર્ણપણે ક્રેશ થઈ ગયા. પેટ્રોલ પંપો પર વાહનોની કિલોમીટરો લાંબી લાઈનો લાગી ગઈ, કરિયાણાની દુકાનો પર સર્વર ડાઉનના પાટિયા ઝૂલવા માંડ્યા અને લોકોમાં ફફડાટ ફેલાઈ ગયો. આખો દેશ જાણે આર્થિક પેરાલિસિસનો ભોગ બની ગયો હતો.
“આદિત્ય, આ કોઈ સામાન્ય લૂંટ નથી,” કબીરની આંખોમાં તીક્ષ્ણતા આવી ગઈ. “સાયબર મંથનમાં આપણે જોયું હતું કે હેકર્સ પૈસા ક્રિપ્ટો મિક્સર્સમાં મોકલીને હવાલા નેટવર્ક દ્વારા વિદેશ મોકલતા હતા. અહીં એવું થાય છે? આ અબજો રૂપિયા ક્યાં વહી રહ્યા છે?”
“હું એ જ ટ્રેસ કરી રહ્યો છું...” આદિત્યએ પોતાની કમાન્ડ પ્રોમ્પ્ટમાં ‘ઓપરેશન સાગર મંથન’ વખતે વિકસાવેલું ડીપ-પેકેટ ઇન્સ્પેક્શન ટૂલ એક્ટિવેટ કર્યું. તેણે ટ્રાન્ઝેક્શન બ્લોક્સના ડિજિટલ ફિંગરપ્રિન્ટ્સ છૂટા પાડવાનું શરૂ કર્યું.
સ્ક્રીન પર બ્લોકચેનના નોડ્સ લીલા અને પીળા ટપકાં રૂપે દોડવા લાગ્યા. એક, બે, પાંચ, પચાસ... બધા જ ટ્રાન્ઝેક્શન્સ એક ચોક્કસ ડિજિટલ પાઇપલાઇનમાં ભળી રહ્યા હતા.
“વિચિત્ર છે...” આદિત્ય ગણગણ્યો, તેના કપાળની નસો ખેંચાઈ ગઈ. “આ પૈસા સ્વિસ બેંકોમાં નથી જતાં. કોઈ રશિયન કે ચાઈનીઝ ઓફશોર એકાઉન્ટમાં નથી જઈ રહ્યા. નથી કોઈ ડાર્ક વેબના મોનેરો વોલેટમાં જતાં. આ સમગ્ર રકમ એક સુપર-સિક્યોર્ડ, એન્ક્રિપ્ટેડ ‘એઆઈ ક્લાઉડ વોલેટ’માં ઠલવાઈ રહી છે.”
“તો એ ક્લાઉડ વોલેટ કોણ ઓપરેટ કરી રહ્યું છે? એનું લોકેશન કાઢ!” કબીરે આદેશાત્મક સ્વરે કહ્યું.
આદિત્યએ હેક્સ-ડેસિબલ એડ્રેસને ડી-કોડ કરવા માટે ક્વોન્ટમ ડીક્રિપ્શન એલગોરિધમ રન કર્યું. સેકન્ડોની ઉત્કંઠા બાદ સ્ક્રીન પરથી લેયર્સ હટવા માંડ્યા. એક પછી એક વર્ચ્યુઅલ પ્રોક્સી સર્વર્સ બાયપાસ થયા. સિંગાપોર... ફ્રેન્કફર્ટ... દુબઈ... અને આખરે સિગ્નલ ભારતની સરહદમાં પાછું આવ્યું.
સ્ક્રીન પર લોકેશન મેપ ઝૂમ-ઇન થવા લાગ્યો: નવી દિલ્હી ➔ લ્યુટિયન્સ ઝોન ➔ નોર્થ બ્લોક.
આદિત્યના હાથ કીબોર્ડ પરથી અટકી ગયા. તેનો ચહેરો સફેદ પૂણી જેવો થઈ ગયો. તેણે કંપતા હોઠે કબીર તરફ જોયું.
“કબીર... આ અશક્ય છે...”
“શું મળ્યું? બોલ આદિત્ય!”
આદિત્યએ મોનિટર કબીર તરફ ફેરવ્યું. સ્ક્રીન પર સ્પષ્ટ અક્ષરોમાં એન્ડ-પોઇન્ટ ડિવાઇસની વિગતો અને આઈપી (IP) એડ્રેસ ચમકી રહ્યું હતું:
TARGET MAC ADDRESS: 4A:7F:99:BC:12
DEVICE: SECURE QUANTUM-PAD (GOVT. ISSUED)
USER LOGGED IN: દેશના કેન્દ્રીય નાણાં મંત્રી (FINANCE MINISTER, GOVT OF INDIA)
દેશની તિજોરીને લૂંટીને અબજો રૂપિયા હડપ કરી રહેલું એ અદ્રશ્ય એઆઈ ક્લાઉડ વોલેટ બીજે ક્યાંય નહીં, પણ નવી દિલ્હીમાં બેઠેલા ભારતના ફાઇનાન્સ મિનિસ્ટરના પર્સનલ ઓફિશિયલ ટેબ્લેટ સાથે જોડાયેલું હતું!

૨


Share

NEW REALESED